| |
 |
|
|
1.- Helburua
2.- Egutegia
3.- Sariak
4.- Parte hartzeko baldintzak
5.- Izen-ematea
6.- Lanak bidaltzea
7.- Lanak ebaluatzea eta argitaratzea
8.- Epaimahaiaren erabakia
9.- Eskubideak erreserbatzea
1.- Helburua
a. Si eres original, eres de libro lehiaketaren helburua da DBHko, Batxilergoko eta lanbide-heziketako erdi-mailako heziketa-zikloetako ikasleek ikerketa-lan originalak egitea beren intereseko gai bati buruz: musika, zientzia, literatura, artea, natura, historia, zinema, kirolak, filosofia eta pentsamendua, teknologiak, matematika...
b. Lanak Espainiako hizkuntza ofizial guztietan aurkez daitezke.
c. Web bidez baino ez da kudeatuko lehiaketa:
- Izen-emateak: formularioa linean (Eman izena)
- Kontsultak (concurso@esdelibro.es)
- Lanak lehiaketara bidaltzea: formularioa linean (Bidali lana)
2.- Egutegia
a. Lehiaketa 2009ko irailaren 15ean hasi eta 2010eko maiatzean amaituko da. Hona hemen prozesu osorako ezarrita dauden datak:
- 2009ko irailaren 15a. Izena emateko eta lanak entregatzeko epea irekiko da.
- 2010eko otsailaren 1a. Izena emateko epea itxiko da.
- 2010eko martxoaren 22a. Lanak entregatzeko epea amaituko da.
- 2010eko maiatza. Epaimahaia elkartuko da irabazleak zein diren erabakitzeko, irabazleak zein diren publikoki jakinaraziko da (ikastetxeak, irakasleak, ikasleak) eta sariak emango dira.
3.- Sariak
a. Bederatzi lehen sari ezarri dira:
- Hiru DBHko lehen zikloko lan onenentzat.
- Hiru DBHko bigarren zikloko lan onenentzat.
- Hiru batxilergoko/erdi-mailako heziketa-zikloetako lan onenentzat.
b. Hauek dira sariak:
- Ikasleentzat
 120 euroko TXEKEA, liburuak erosteko.
ORDENAGAILU ERAMANGARRI bat lan saridunen egile den ikasle bakoitzarentzat.
- Irakasleentzat
200 euroko TXEKEA, liburuak erosteko.
ORDENAGAILU ERAMANGARRI bat ikerketa saridunak koordinatu dituen irakasle bakoitzarentzat.
- Ikastetxeentzat
1.000 euroko TXEKEA, ikastetxe saridunetako liburutegietarako liburuak erosteko.
c. Sarien ordez ezin da jaso sari horien balioa dirutan. Liburuak erosteko jasotako txekeak CEGAL Espainiako Gremioen eta Liburu-saltzaileen Elkarteen Konfederazioari atxikitako saltokietan aldatuko dira.
d. Parte-hartzaile guztiek diploma digital bat jasoko dute (irakasle-koordinatzaileari bidaliko zaio, eta esdelibro.es webgunetik ere deskarga daiteke), lehiaketan parte hartu dutela ziurtatzeko. Lan bat bidali duten ikasleek Es de libroren MOTXILA bat jasoko dute, eta, lan bat edo gehiago koordinatu dituzten irakasleek, berriz, MEMORIA-GILTZA bat.
e. Finalera iritsi diren lanak egin dituzten taldeek (kategoria bakoitzean hamar) epaimahaiaren aipamen berezia jasoko dute.
4.- Parte hartzeko baldintzak
a. Hona hemen talde parte-hartzaileen eginbeharrak:
- Lan original bat egitea. Lanek originalak izan behar dute, lehenagotik osorik edo partzialki argitaratu gabeak, eta beste sariketaren batera aurkeztu gabeak.
- Lan pertsonal bat egitea. Ikasleek egin eta idatzi behar dute, eta irakasleak ikuskatu eta koordinatu. Aintzat hartuko da lanak ikasleen hezkuntza-mailakoak izatea.
- Aukeratutako lanaren arabera, ikerketa-metodologia ona erabiltzea (liburutegiak bisitatzea, Internet kontsultatzea, elkarrizketak edo inkestak egitea, proba esperimentalak egitea...).
- Jabetza intelektualeko printzipio guztiak errespetatzea (iturriak adieraztea; legez kanpoko fotokopiak ez egitea; Jabetza Intelektualaren Legeak babestutako irudiak, testuak, musika-lanak edo bestelako lanak ez sartzea aurretiko baimenik gabe...).
- Liburu eta dokumentu askotarikoak erabiltzea (entziklopedia inprimatuak edo elektronikoak, liburu monografikoak, aldizkari edo egunkarietako artikuluak, Interneteko eduki fidagarriak...).
- Originala izatea ideiak aurkeztean; ez kopiatzea eta ez plagiatzea.
b. Lanak taldetan egin behar dira (gutxienez bi ikasle eta gehienez lau izango dira talde bakoitzean), eta beti irakasle bakar batek koordinatu behar ditu.
c. Ikasle edo talde batek behin bakarrik har dezake parte. Irakasle berak gehienez sei lanetan eman dezake izena, eta gehienez sei lan aurkez ditzake.
d. Lanak koordinatuko dituzten irakasleek zeregin hauek izango dituzte:
- Ikasleak motibatzea eta lan-prozesuan gidatzea.
- Lehiaketako helburuak eta oinarriak betetzen dituzten lanak egiten dituztela ziurtatzea.
- Lanek egile-eskubideak eta jabetza intelektualeko arauak ahalik eta gehiena errespeta ditzaten zaintzea.
5.- Izen-ematea
a. Parte-hartzaileek esdelibro.es web-aren atalean eman behar dute izena (Eman izena).
b. Izen-ematea formalizatu ondoren, irakasleak identifikazio-zenbaki bat eta jakinarazpen bat jasoko ditu posta elektronikoz, parte-hartzea baliozkotzeko. Identifikazio-zenbakia lana bidaltzeko behar da. Izena eman duten irakasle eta ikasleek Es de libroren webgunetik deskarga ditzakete ikerketa-lanean laguntzeko gidak eta materialak.
c. Behar bezala betetako izen-emateak baino ez dira onartuko.
Ezarritako ordutegi eta datetatik kanpo jasotako izen-emateak ez dira bideratuko.
d. Datu Pertsonalak Babesteko Lege Organikoaren arabera (abenduaren 13ko 15/1999 Lege Organikoa), «identifikatu daitezkeen nahiz identifikatu ezin diren pertsona fisikoei dagokien informazio guztia da datu pertsonala».
Erabiltzaileek esdelibro.es webeko inprimakien bidez baimentzen dituzten datu pertsonaletarako sarbidea bakarrik izango du ESKUBIDE ERREPROGRAFIKOEN ESPAINIAKO ZENTROAK (hemendik aurrera CEDRO deituko diogu).
Indarrean dagoen araudia betetzeko, datu pertsonalen segurtasuna mantentzeko behar diren neurri teknikoak eta antolamenduari dagozkionak hartu ditu CEDROk. Gainera, baimendu gabeko sarbideak saihesteko behar diren mekanismoak instalatu ditu.
Jakinarazten dizugu, abenduaren 13ko 15/1999 Lege Organikoak dioenarekin bat (Datu Pertsonalak Babestekoa), zure datuak fitxategi batean egongo direla, eta CEDRO dela fitxategi horren arduraduna. Gainera, datu horiek eskatutako zerbitzua kudeatzeko eta bideratzeko erabiliko dira, eta baita gure jarduerei buruzko informazioa eta egile-eskubideekin eta kulturarekin loturiko informazioa bidaltzeko ere.
Horrez gain, jakinarazten dizugu sarbide-, zuzenketa- eta baliogabetze-eskubideak dituzula, eta eskubidea duzula, baita ere, gure jarduerei buruzko informazioarekin eta egile-eskubideekin eta kulturarekin loturiko informazioa bidaltzeko zure baimena baliogabetzeko. Horretarako, mezu bat bidal dezakezu cedro@cedro.org helbide elektronikora, edo gutun bat idatzi helbide honetara: calle Monte Esquinza, n.º 14, 3º dcha., 28010 Madrid.
6.- Lanak bidaltzea
a. Talde bakoitzak fitxategi konprimitu bat bidali behar du. Gehienez 8 MB-ko tamaina izan behar du, eta eduki hau izan behar du:
- Egindako lana: testu-dokumentua, bideoa, diapositiba-aurkezpena, soinu-fitxategia, web orria... izan daiteke. Lana testu-formatuan aurkeztuz gero, ordenagailuz idatzita egon behar du; A4 formatua, 12 puntuko letra-tamaina eta 1,5eko lerroartea izan behar ditu. Gehienez 20 orrikoa izango da.
- Txosten labur bat, gehienez bost orrikoa. Egindako ikerketa, aukeratutako gaia, egindako urratsak, kontsultatutako dokumentazioa, ondorioak eta abar azaldu behar ditu.
Horrez gain, lanak eranskin bat edo gehiago izan ditzake, egokia irudituz gero, ikerketako emaitzak adierazteko, osatzeko edo azaltzeko material garrantzitsua biltzeko (adibidez, argazki-erreportajea, bideo-lagina, audio-grabazioak, animazioak eta abar). Eranskinek neurri edo iraupen hau izan behar dute gehienez:
- testua: 30 orrialde
- diapositiba-aurkezpena: 20 diapositiba
- bideoa: 10 minutu
Lana, txostena eta eranskinak Espainiako edozein hizkuntza ofizialetan aurkez daitezke. Formatu digitalean aurkeztutako lanak baino ez dira onartuko.
b. Lanak bidaltzeko Bidali lana atalean ageri den formularioa erabili behar da. Lana bidali aurretik, taldearen irakasle koordinatzailearen helbide elektronikoa eta lehiaketan izena ematean jasotako identifikazio-zenbakia eskatuko zaizkizu. Lehiakidearen nortasuna egiaztatu ondoren bidali ahal izango da lana.
Lanaren fitxategiak 8 MB-ko gehienezko tamaina gainditzen badu edo web bidez bidaltzean arazoak gertatzen badira, concurso@esdelibro.es helbide elektronikora edo ohiko postaz Es de libro-ren Idazkaritza Teknikora bidal daiteke —CDan edo DVDan—, betiere ezarritako epeen barruan. Hau da Idazkaritza Teknikoaren helbidea: c/ Clavileño, 22. 28002. Madrid.
c. Edozein zalantza edo arazo argitzeko, (tamaina handiagoko fitxategiak bidaltzea, identifikazio-zenbakia ahaztea...), jarri harremanetan esdelibro.es-ekin concurso@esdelibro.es helbidera mezu bat idatziz.
7.- Lanak ebaluatzea eta argitaratzea
a. Lanak jaso ahala, lehiaketako gaien irakasleek eta adituek osatutako batzorde tekniko batek gainbegiratuko ditu, eta jabetza intelektualeko arauak errespetatzen diren egiaztatuko du. Halaber, gutxieneko kalitatea bermatu behar da, lehiaketan formalki sartzeko.
Batzordeak kanpoan utziko ditu hasieratik bukaerara edo zati batean plagioa egin duten lanak. Batzordearen arabera ikasleek egin ez dituzten lanak ere baliogabetu egingo dira.
Erakundeak eskubidea du analisi- eta balorazio-prozesuko edozein unetan lanak kanpoan uzteko, baldin eta frogatzen badu lehiaketako arauak ez dituela betetzen.
b. Lan saridunak edo finalera iritsi direnak esdelibro.es web orrian argitaratuko dira. CEDRO haien egileekin edo lege-ordezkariekin harremanetan jarriko da, dagozkien argitaratze-baimenak formalizatzeko, argitaratze-kontratu baten bitartez. Lana argitaratutakoan, irakasle koordinatzaileari jakinaraziko zaio.
c. Hautagaiek aurkeztutako lan guztiak argitaratzeko (linean, paperean), erakusgai jartzeko edo interes kulturalagatik egokitzat hartzen diren bestelako helburuetarako erabil daitezke, egilearen edo lege-ordezkariaren aurretiko baimena izanez gero. Argitaratutako lanak egileenak baino ez dira, eta haiek dira lanetako edukien eta haietan adierazten den guztiaren erantzule.
8.- Epaimahaiaren erabakia
a. Sarien erabakia 2010eko maiatzean jakinaraziko da. Epaimahaia hainbat ezagutza-arlotan (artea, pentsamendua, literatura, musika, zientzia...) ospetsu diren pertsonek osatuko dute. Kide guztiek lehiaketako lan onenen hautaketa bat jasoko dute, eta lehen sariak erabakiko dituzte.
b. Ebaluazio-irizpideen artean, lehiaketa-oinarrietan eskatutako baldintza formalez gain, oinarri hauetako 4. puntuan aipatutako alderdiak kontuan hartuko dira.
c. 2010eko maiatzean emango dira aditzera irabazleen izenak, eta sarien berri emango zaie.
d. Epaimahaiaren erabakia apelaezina izango da, eta hark argitu behar ditu lehiaketa-oinarriak interpretatzean sor litezkeen zalantzak. Lehiaketan parte hartzeak esan nahi du oinarri guztiak onartzen direla.
9.- Eskubideak erreserbatzea
a. Erakundeak eskubidea du noiznahi lehiaketako baldintzak aldatzeko, baita aurrez ezarritako epearen aurretik bertan behera uzteko ere, betiere horretarako bidezko arrazoia badago. Gainera, konpromisoa du oinarri berriak, lehiaketako baldintzak edo behin betiko bertan behera uztea jakinarazteko, behar adinako aurrerapenez eta publizitatea eginez.
b. Oinarri hauek Carlos Solís Villa jaunaren/andrearen notariotzaren aurrean sinatu dira (helbidea: calle Velázquez 16, 2º dcha, Madrid), eta www.esdelibro.es web orrian kontsultatu daitezke.
|
|
|
|
|
Zer da?
